ನಾನು ನನ್ನ ಗೋಳು

ರಾತ್ರಿ ನಿದ್ದೆಯಲ್ಲಿ ಸೊಳ್ಳೆ ತಿಗಣೆಯೊಂದಿಗೆ ಹೊಡೇದಾಡಿ,
ಬೆಳಿಗ್ಗೆಯೆದ್ದು ಅರೆತೆರೆದ ನಿದ್ದೆಗಣ್ಣಲ್ಲಿ ಭಾತ್ರೂಮನ್ನು ಹುಡುಕಾಡಿ,
ಅಂತು ಇಂತು ಎಲ್ಲರೊಂದಿಗೆ ಅತ್ತಿತ್ತ ಕಿತ್ತಾಡಿ ಚೀರಾಡಿ,
ಒಂದು ಬಕೇಟ್ ನೀರಲ್ಲಿ ಸ್ನಾನಾದಿ ನಿತ್ಯಕರ್ಮವ ಮುಗಿಸುವೆ ನಾನು..(೧)

ಹಿಂದಿನರಾತ್ರಿ ಮಿಕ್ಕಿದ ಹಳಸಿದನ್ನವ ಬಿಸಿ ಮಾಡಿದ ಚಿತ್ರಾನ್ನ,
ಕಾವೇರಿಯೋ ನಂದಿನಿಯೋ ಎಂದು ತಿಳಿಯದ ಕ್ಷೀರವೇ ಪರಮಾನ್ನ
ಕಣ್ಣು ಮೂಗು ಮುಚ್ಚಿಕೊಂಡು ಅದನ್ನೇ ಕಷ್ಟಪಟ್ಟು ತಿಂದು,
ಸಮಯ ಒಂಬತ್ತಕ್ಕೆಲ್ಲಾ ಎದುರುಸಿರು ಬಿಡುತ್ತಾ ಆಫೀಸಿಗೆ ಓಡುವೆ ನಾನು…(೨)

ಬೆವರೆಂಬ ದುರ್ಗಂಧದ ಕಾರ್ಖಾನೆ ನಮ್ಮ ಈ ಆಫೀಸ್ ಬಸ್ಸು,
ಒಂದುದಿನವೂ ಮುಖವರಳಿಸದ ಜ್ಯು.ದೂರ್ವಾಸ ನಮ್ಮ ಬಾಸು,
ಹೇಗಾದ್ರೂ ಮಾಡಿ ಹೆಚ್ಚಿಸಬೆಕೆಂದುಕೊಂಡರೆ ನನ್ನ ತಿಂಗಳಿನ ಕಾಸು,
ರಕ್ಕಸನಂತೆ ಕೂಗಾಡುವುದ ಕೇಳಲಾಗದೇ ನನ್ನ ಜಾಗದಲ್ಲೇ ಕುಳಿತಿರುವೆ ನಾನು..(೩)

ಅಯ್ಯೋ ಶಿವನೇ ಅಂತಾ ಕಬ್ಬನ್ ಪಾರ್ಕ್ ಗೆ ಹೋಗುತ್ತಿದ್ದೆ,
ಅಲ್ಲೂ ನೆಮ್ಮದಿಯಿಲ್ಲ ಕಾರಣ, ಅಲ್ಲಿರುವ ಮೂತಿಗಳೆಲ್ಲಾ ದಿನಾ ನೋಡಿದ್ದೇ,
ಆದದ್ದಾಗಲೆಂದು ಒಂದು ಚೆಲುವೆಗೆ ನಾ ಹೇಳಿದೆ “ನಿನ್ನೇ ಪ್ರೀತಿಸುವೆ” ಅಂತಾ,
ಮೂಗು ಮುರಿದು ಅವಳಂದಳು “ಅವನೇ ನನ್ ಗಂಡ” ಅದೂ ಸ್ವಂತ..!!!!!!(೪)
Pradeep Hegde